امپورٹڈ حکومت میری جان بھی لے لے تو مجھے کوئی ڈر نہیں، عمران خان

عمران خان نے کہا ہے کہ امپورٹڈ حکومت میری جان بھی لے لے تو مجھے کوئی ڈر نہیں۔

تفصیلات کے مطابق پاکستان تحریک انصاف (پی ٹی آئی) کے چیئرمین عمران خان نے ٹیکسلا میں پارٹی جلسے سے خطاب کرتے ہوئے کہا کہ پاکستان کو ایسے سیاستدانوں کی ضرورت ہے جن کے ضمیر برائے فروخت نہیں ہوتے۔

ان کا کہنا تھا کہ میرے گھر پر تیسری بار پولیس بھیجی گئی، حکمرانوں سن لو، مجھے دھمکیاں دینے کے بجائے جیل میں ڈالو پر پاکستان میں حقیقی تحری کی آزادی چل پڑی ہے، نہ ہمیں تمہارے جیلوں سے ڈر ہے اور نہ ہی
نامعلوم فون لاکز سے ڈر لگتا ہے۔

عمران خان نے کہا کہ قوم تیار ہے جیل بھیج کر دکھاؤ، جیل جانے کیلئے میں اور میری قوم تیار ہے، 28 مارچ کو قوم کو مراسلہ دکھایا جس میں سازش واضح تھی، مراسلے میں کہا گیا کہ اگر عمران خان کو ہٹا دیا گیا تو پاکستان کو معاف کر دیں گے۔

پی ٹی آئی چیئرمین نے کہا کہ صدر مملکت اور اسپیکر قومی اسمبلی نے مراسلہ چیف جسٹس کو تحقیقات کیلئے بھجوایا، سب سے بڑی ترجمان مریم نے کہا کہ یہ مراسلہ جھوٹ ہے، مریم کو درست رپورٹنگ کرنے پر شاباش دیتا ہوں، نیا ڈرامہ شروع ہو گیا ہے کہ سائفر غائب ہو گیا، مریم نواز کو کہتا ہوں سائفر کی کاپی دفتر خارجہ میں موجود ہے۔

ان کا کہنا تھا کہ ہماری حکومت اس لیے ختم کی گئی کہ ملک میں مہنگائی بڑھ گئی تھی، بلاول بھٹو نے مہنگائی کے خلاف مارچ کیا، پاکستان میں اس وقت سب سے زیادہ مہنگائی ہے، ملک میں آٹے کی فی کلو قیمت 100روپے سے زیادہ ہو گئی ہے، تحریک انصاف کی حکومت میں پیٹرول 150روپے فی لیٹر تھا۔

عمران خان نے کہا کہ پاکستان کی معیشت ہر روز نیچے جا رہی ہے، حکمرانوں نے کرپشن کے کیسز معاف کرائے اور مہنگائی میں اضافہ کیا۔

ان کا کہنا تھا کہ ہر دوسرے دن ہمیں ڈرانے کی کوشش کی جاتی ہے، پاکستانی قوم نے خوف کے بت کو توڑ دیا ہے، اسحاق ڈار کو یقین دلایا گیا کہ تمہیں کچھ نہیں ہو گا، ڈار ڈیل کے بغیر پاکستان نہیں آسکتا تھا۔

انہوں نے کہا کہ ملک کی حقیقی آزادی کیلئے آپ سب نے میرا ساتھ دینا ہے، ہم ملک میں قانون کی بالادستی کو یقینی بنائیں گے، لندن کے سب سے مہنگے علاقے میں ان کی اربوں روپے کی پراپرٹیز ہیں لیکن مریم نواز نے کہا کہ لندن تو چھوڑو پاکستان میں بھی میری کوئی پراپرٹی نہیں  ہے۔