بل گیٹس اب دنیا کو لاحق کس خطرے کی روک تھام کیلئے کام کررہے ہیں؟
مائیکرو سافٹ کے بانی بل گیٹس ہمارے سیارے کو ایک اور بڑے خطرے سے بچانے کی کوششیں کررہے ہیں۔
حال ہی میں ایک انٹرویو کے دوران مائیکرو سافٹ کے بانی بل گیٹس نے کہا کہ موسمیاتی تبدیلیوں کی روک تھام کے لیے بریک تھرو انرجی وینچرز نامی ادارے کے لیے فنڈز اکٹھے کیے جارہے ہیں۔
انہوں نے کہا کہ مجھے امید ہے کہ بریک تھرو انرجی وینچرز کے لیے ہمارا کام عالمی معیشت کو بدلے گا اور دنیا زہریلی گیسز کے اخراج کو روکنے کے قریب پہنچ جائے گی۔
بل گیٹس نے کہا کہ زہریلی گیسز کے اخراج کو صفر کرنے تک موسمیاتی تبدیلیوں کی روک تھام ممکن نہیں اور ہمارا ادارہ اسی حوالے سے کام کرے گا، جس کے لیے مختلف کمپنیوں کی جانب سے فنڈز دیے جارہے ہیں۔
ن کا کہنا تھا کہ زہریلی گیسز کا 65 فیصد اخراج متوسط آمدنی والے ممالک کی جانب سے کیا جاتا ہے اور اس کو صفر تک لانے کا واحد ذریعہ نئی ٹیکنالوجیز ہی ہیں، کیونکہ ماضی میں سب سے زیادہ زہریلی گیسز کو خارج کرنے والے امیر ممالک کی جانب سے سرمایہ لگانے سے انکار کیا گیا۔
انہوں نے کہا کہ بہت زیادہ سرمایہ طویل المعیاد اسٹوریج، گرین ہائیڈروجن، بجلی کی ترسیل کے بہتر نظام، کسی زہریلی گیس کے اخراج کے بغیر مختلف مصنوعات بشمول سیمنٹ اور اسٹیل کی تیاری پر خرچ کیا جارہا ہے، ان سب پر کام ابھی ابتدائی مرحلے میں ہے، ماحول کے لیے کم نقصان دہ سیمنٹ کی تیاری زیادہ مہنگی ہوگی۔
انہوں نے کہا کہ نئی ٹیکنالوجیز کے بغیر دنیا موسمیاتی تبدیلیوں کے بحران کا مقابلہ نہیں کرسکے گی۔
